Now be we caytifs, as it is well seene :
Thanked be fortune, and hire false wheel,
That noon estat assureth to ben weel
And certus, lord, to abiden youre presence
Here in the temple of the goddesse Clemence
We han ben waytynge al this fourtenight:
Now helpe us, lord, syn it is in thy might.
I wrecche, which that wepe and waylle thus,
Was whilom wyf to kyng Capaneus,
That starf at Thebes, cursed be that day:
And alle we that ben in this array,
And maken alle this lamentacioun,
We leften alle oure housbondes at the toun,
Whil that the sege ther aboute lay.
And yet the olde Creon, welaway!
That lord is now of Thebes the citee,
Fulfilde of ire and of iniquité,
He for despyt, and for his tyrannye,
To do the deede bodyes vilonye,
Of alle oure lordes, which that ben i-slawe,
Hath alle the bodies on an heep y-drawe,
And wol not suffren hem by noon assent
Nother to ben y-buried nor i-brent,
But maketh houndes ete hem in despite."
And with that word, withoute more respite,
They fillen gruf, and criden pitously,
Have on us wrecched wommen som mercy,
And lat oure sorwe synken in thyn herte."
This gentil duke doun from his courser sterte
With herte pitous, whan he herde hem speke.
Him thought that his herte wolde breke,
Whan he seyh hem so piteous and so maat,
That whilom weren of so gret estat.
And in his armes he hem alle up hente,
And hem conforteth in ful good entente;
And swor his oth, as he was trewe knight,
He wolde do so ferforthly his might
Upon the tyraunt Creon hem to wreke,
That all the poeple of Grece scholde speke
How Creon was of. Theseus y-served,
As he that hath his deth right wel deserved.
And right anoon, withoute eny abood,
His baner he desplayeth, and forth rood
To Thebes-ward, and al his oost bysyde;
No ner Athenes wolde he go ne ryde,
Ne take his eese fully half a day,
But onward on his way that nyght he lay;
And sente anoon Ypolita the queene,
And Emelye hir yonge suster schene,
Unto the toun of Athenes to dwelle:
And forth he ryt; ther is no more to telle.
The reede statue of Mars with spere
So schyneth in his white baner large,
That alle the feeldes gliteren up and doun:
And by his baner was born his pynoun
Of gold ful riche, in which ther was i-bete
The Minatour which that he slough in Crete.
Thus ryt this duk, thus ryt this conquerour,
And in his oost of chevalrie the flour,
Til that he cam to Thebes, and alighte
Fayre in a feeld wher as he thoughte to fighte.
But schortly for to speken of this thing,
With Creon, which that was of Thebes kyng,
He faught, and slough him manly as a knight
In pleyn bataille, and putte his folk to flight;
And by assaut he wan the cité aftur,
And rente doun bothe wal, and sparre, and raftur :
And to the ladies he restored agayn
The bones of here housbondes that were slayn,
To do exequies, as was tho the gyse.
But it were al to long for to devyse
The grete clamour, and the waymentynge,
Which that the ladies made at the brennynge
Of the bodyes, and the grete honour,
That Theseus the noble conquerour
Doth to the ladyes, whan they from him wente :
But schortly for to telle is myn entente.
Whan that this worthy duk, this Theseus,
Hath Creon slayn, and Thebes wonne thus,
Stille in the feelde he took al night his reste,
And dide with al the contré as him leste.
To ransake in the cas of bodyes dede
Hem for to streepe of herneys and of wede,
The pilours diden businesse and cure,
After the bataile and discomfiture.
And so byfil, that in the cas thei founde,
1007.-cas. So the other best MSS. Tyrwhitt has substituted tas, a heap.
Thurgh girt with many a grevous blody wounde,
Two yonge knightes liggyng by and by,
Bothe in oon armes clad ful richely:
Of whiche two, Arcite hight that oon,
And that othur knight hight Palamon.
Nat fully quyk, we fully deed they were,
But by here coote armure, and by here gere,
Heraudes knewe hem wel in special,
As they that weren of the blood real
Of Thebes, and of sistren tuo i-born.
Out of the chaas the pilours han hem torn,
And han hem caried softe unto the tente
Of Theseus, and ful sone he hem sente
Tathenes, for to dwellen in prisoun
Perpetuelly, he wolde no raunceoun.
And this duk whan he hadde thus i-doon,
He took his host, and hom he ryt anoon
With laurer crowned as a conquerour;
And there he lyveth in joye and in honour
Terme of his lyf; what wolle ye wordes moo?
And in a tour, in angwische and in woo,
This Palamon, and his felawe Arcite,
For evermo, ther may no gold hem quyte.
This passeth yeer by yeer, and day by day,
Till it fel oones in a morwe of May
That Emelie, that fairer was to seene
Than is the lilie on hire stalkes grene,
And fresscher than the May with floures newe;
For with the rose colour strof hire hewe,
I not which was the fyner of hem two.
Er it was day, as sche was wont to do,
Sche was arisen, and al redy dight.
For May wole have no sloggardye a night.
The sesoun priketh every gentil herte,
And maketh him out of his sleepe sterte,
And seith, "Arys, and do thin observance."
This maked Emelye han remembrance
To do honour to May, and for to ryse.
I-clothed was sche fressh for to devyse.
Hire yolwe heer was browdid in a tresse,
Byhynde hire bak, a yerde long I gesse.
And in the gardyn at the sonne upriste
Sche walketh up and doun wher as hire liste.
Sche gadereth floures, partye whyte and reede,
To make a certeyn gerland for hire heede,
And as an aungel hevenly sche song.
The grete tour, that was so thikke and strong,
Which of the castel was the cheef dongeoun,
(Ther as this knightes weren in prisoun,
1049.-to do honour to May. The early English poets are full of allusions to the popular reverence paid to the month of May, derived from the pagan ages of our forefathers. Traces of these superstitions still remain in the popular custom in different parts of the country of going a Maying on the morning of the first day of the month. Such customs are repeatedly alluded to in Chaucer.
1059.-dongeoun. The dongeon was the grand tower of the earlier castles, and beneath it, under ground, was the prison. As the castles were enlarged, the dongeon or keep tower, being the strongest part of the fortress, was frequently made the residence of prisoners of higher rank, who were not thrown into the subterranean vaults. Hence the modern use of the word dungeon.
|