Gaurana, et Cosmi toto mergatur aëno. Exspectata diù tandem provincia quum te Rectorem accipiet, pone iræ fræna modumque, Pone et avaritiæ; miserere inopum sociorum. Ossa vides regum vacuis exsucta medullis. Respice, quid moneant leges, quid curia mandet, Præmia quanta bonos maneant, quàm fulmine justo Et Capito et Numitor ruerint, damnante senatu, Piratæ Cilicum. Sed quid damnatio confert, Quum Pansa eripiat, quidquid tibi Natta reliquit ? Præconem, Chærippe, tuis circumspice pannis, Jamque tace. Furor est post omnia perdere naulum. Non idem gemitus olim, neque vulnus erat par Damnorum, sociis florentibus et modò victis. Plena domus tunc omnis, et ingens stabat acervus Nummorum, Spartana chlamys, conchylia Coa, Et cum Parrhasii tabulis signisque Myronis Phidiacum vivebat ebur, nec non Polycleti Multus ubique labor: raræ sine Mentore mensæ. Indè Dolabella est atque hinc Antonius, inde Sacrilegus Verres referebant navibus altis Occulta spolia, et plures de pace triumphos.
Nunc sociis juga pauca boum, grex parvus equarum, Et pater armenti capto eripiatur agello;
Ipsi deinde Lares, si quod spectabile signum,
Si quis in ædiculâ deus unicus. Hæc etenim sunt
Pro summis: nam sunt hæc maxima. Despicias tu
Forsitan imbelles Rhodios, unctamque Corinthon: Despicias meritò. Quid resinata juventus, Cruraque totius facient tibi levia gentis? Horrida vitanda est Hispania, Gallicus axis, Illyricumque latus: parce et messoribus illis,
Qui saturant urbem, Circo scenæque vacantem.
Quanta autem inde feres tam diræ præmia culpæ, Quum tenues nuper Marius discinxerit Afros? Curandum in primis, ne magna injuria fiat
Fortibus et miseris. Tollas licèt omne, quod usquam est Auri atque argenti; scutum gladiumque relinques, Et jacula et galeam: spoliatis arma supersunt. Quod modò proposui, non est sententia: verùm Credite, me vobis folium recitare Sibyllæ. Si tibi sancta cohors comitum, si nemo tribunal Vendit Acersecomes, si nullum in conjuge crimen, Nec per conventus et cuncta per oppida curvis
Unguibus ire parat nummos raptura Celæno : Tunc licet a Pico numeres genus; altaque si te Nomina delectant, omnem Titanida pugnam Inter majores ipsumque Promethea ponas: De quocunque voles proavum tibi sumito libro. Quòd si præcipitem rapit ambitio atque libido, Si frangis virgas sociorum in sanguine, si te Delectant hebetes lasso lictore secures ; Incipit ipsorum contra te stare parentum Nobilitas, claramque facem præferre pudendis. Omne animi vitium tanto conspectius in se Crimen habet, quanto major, qui peccat, habetur. Quò mihi te solitum falsas signare tabellas In templis, quæ fecit avus, statuamque parentis Ante triumphalem? quò, si nocturnus adulter Tempora Santonico velas adoperta cucullo? Præter majorum cineres atque ossa volucri Carpento rapitur pinguis Damasippus, et ipse, Ipse rotam adstringit multo sufflamine Consul: Nocte quidem; sed luna videt, sed sidera testes Intendunt oculos. Finitum tempus honoris Quum fuerit, clarâ Damasippus luce flagellum Sumet, et occursum nunquam trepidabit amici Jam senis, ac virgâ prior annuet, atque maniplos Solvet, et infundet jumentis hordea lassis. Interea, dum lanatas torvumque juvencum More Numæ cædit Jovis ante altaria, jurat
Solam Eponam et facies olida ad præsepia pictas. Sed quum pervigiles placet instaurare popinas; Obvius assiduo Syrophoenix udus amomo Currit, Idumææ Syrophoenix incola portæ, Hospitis affectu dominum regemque salutat, Et cum venali Cyane succincta lagenâ.
Defensor culpæ dicet mihi, Fecimus et nos Hæc juvenes. Esto. Desîsti nempe, nec ultrà Fovisti errorem. Breve sit, quod turpiter audes. Quædam cum primâ resecentur crimina barbâ. Indulge veniam pueris. Damasippus ad illos Thermarum calices inscriptaque lintea vadit, Maturus bello, Armeniæ Syriæque tuendis
Amnibus, et Rheno atque Istro. Præstare Neronem
Securum valet hæc ætas. Mitte Ostia, Cæsar, Mitte; sed in magnâ legatum quære popinâ. Inveries aliquo cun percussore jacentem,
Permixtum nautis, et furibus, ac fugitivis, Inter carnifices, et fabros sandapilarum, Et resupinati cessantia tympana Galli. Æqua ibi libertas, communia pocula, lectus Non alius cuiquam, nec mensa remotior ulli. Quid facias talem sortitus, Pontice, servum ? Nempe in Lucanos, aut Tusca ergastula mittas. At vos, Trojugenæ, vobis ignoscitis, et, quæ 'Turpia cerdoni, Volesos Brutumque decebunt. Quid, si nunquam adeò fœdis adeòque pudendis Utimur exemplis, ut non pejora supersint? Consumptis opibus vocem, Damasippe, locâsti Sipario, clamosum ageres ut Phasma Catulli. Laureolum velox etiam bene Lentulus egit, Judice me, dignus verâ cruce. Nec tamen ipsi Ignoscas populo; populi frons durior hujus, Qui sedet, et spectat triscurria patriciorum, Planipedes audit Fabios, ridere potest qui Mamercorum alapas. Quanti sua funera vendant, Quid refert? vendunt nullo cogente Nerone, Nec dubitant celsi prætoris vendere ludis. Finge tamen gladios inde, atque hinc pulpita pone: Quid satius ? Mortem sic quisquam exhorruit, ut sit Zelotypus Thymeles, stupidi collega Corinthî? Res haud mira tamen, citharœdo Principe, mimus Nobilis. Hæc ultra, quid erit nisi ludus? Dedecus Urbis habes: nec mirmillonis in armis, Nec clypeo Gracchum pugnantem, aut falce supinâ ; (Damnat enim tales habitus; sed damnat, et odit)
Nec galeâ frontem abscondit: movet ecce tridentem, Postquam libratâ pendentia retia dextrâ
Nequidquam effudit, nudum ad spectacula vultum Erigit, et totâ fugit agnoscendus arenâ. Credamus tunica, de faucibus aurea quum se Porrigat, et longo jactetur spira galero. Ergò ignominiam graviorem pertulit omni Vulnere, cum Graccho jussus pugnare secutor. Libera si dentur populo suffragia, quis tam Perditus, ut dubitet Senecam præférre Neroni; Cujus supplicio non debuit una parari Simia, nec serpens unus, nec culeus unus? Par Agamemnonidæ crimen; sed causa facit rem Dissimilem. Quippe ille, deis auctoribus, ultor Patris erat cæsi media inter pocula; sed nec
Electræ jugulo se polluit, aut Spartani Sanguine conjugii, nullis aconita propinquis Miscuit, in scenâ nunquam cantavit Orestes. Troica non scripsit. Quid enim Verginius armis Debuit ulcisci magìs, aut cum Vindice Galba? Quid Nero tam sævâ crudâque tyrannide fecit? Hæc opera, atque hæ sunt generosi Principis artes, Gaudentis fœdo peregrina ad pulpita saltu Prostitui, Graiæque apium meruisse coronæ. Majorum effigies habeant insignia vocis: Ante pedes Domitî longum tu pone Thyestæ Syrma vel Antigona, seu personam Menalippes, Et de marmoreo citharam suspende colosso. Quid, Catilina, tuis natalibus, atque Cethegi, Inveniet quisquam sublimius? Arma tamen vos Nocturna et flammas domibus templisque parâstis, Ut Bracatorum pueri, Senonumque minores, Ausi, quod liceat tunicâ punire molestâ. Sed vigilat Consul, vexillaque vestra coërcet. Hic novus Arpinas, ignobilis, et modò Romæ Municipalis Eques, galeatum ponit ubique Presidium attonitis, et in omni gente laborat. Tantum igitur muros intra toga contulit illi
Nominis et tituli, quantum non Leucade, quantum
Thessaliæ campis Octavius abstulit udo
Cædibus assiduis gladio. Sed Roma parentem,
Roma patrem patriæ Ciceronem libera dixit.
Arpinas alius Volscorum in monte solebat Poscere mercedes alieno lassus aratro,
Plebeia Deciorum animæ, plebeia fuerunt
Nomina: pro totis legionibus hi tamen, et pro Omnibus auxiliis, atque omni pube Latinâ, Sufficiunt dîs infernis Terræque parenti : Pluris enim Decii, quàm quæ servantur ab illis. Ancillâ natus trabeam, et diadema Quirini,. Et fasces meruit regum ultimus ille bonorum. Prodita laxabant portarum claustra tyrannis
Exsulibus juvenes ipsius Consulis, et quos Magnum aliquid dubiâ pro libertate deceret, Quod miraretur cum Coclite Mucius, et quæ Imperii fines Tiberinum virgo natavit. Occulta ad patres produxit crimina servus Matronis lugendus: at illos verbera justis Afficiunt pœnis, et legum prima securis.
Malo pater tibi sit Thersites, dummodo tu sis Eacidæ similis, Vulcaniaque arma capessas, Quàm te Thersitæ similem producat Achilles. Et tamen, ut longè repetas, longèque revolvas Nomen, ab infami gentem deducis asylo. Majorum primus quisquis fuit ille tuorum, Aut pastor fuit, aut illud, quod dicere nolo.
SCIRE velim, quare toties mihi, Nævole, tristis Occurras fronte obductâ, ceu Marsya victus.- Non erat hâc facie miserabilior Crepereius Pollio, qui triplicem usuram præstare paratus Circuit et fatuos non invenit. Unde repentè Tot ruga? certè modico contentus agebas Vernam equitem, conviva joco mordente facetus, Et salibus vehemens intra pomaria natis. Omnia nunc contrà: vultus gravis, horrida siccæ Silva comæ, nullus totâ nitor in cute, qualem Bruttia præstabat calidi tibi fascia visci: Sed fruticante pilo neglecta et squalida crura. Quid macies ægri veteris, quem tempore longo Torret quarta dies, olimque domestica febris? Deprêndas animi tormenta latentis in ægro Corpore, deprêndas et gaudia: sumit utrumque Indè habitum facies. Igitur flexisse videris Propositum, et vitæ contrarius ire priori.
Nuper enim, ut repeto, fanum Isidis, et Ganymeden, Pacis, et advectæ secreta palatia Matris,
Et Cererem (nam quo non prostat fœmina templo?)
Notior Aufidio machus celebrare solebas.—
Utile et hoc multis vitæ genus: at mihi nullum
Indè operæ pretium. Pingues aliquando lacernas, Munimenta toga, duri crassique coloris,
« PreviousContinue » |