But yet encreseth me this wonder newe, That no wight woot that she is deed, but I; So many men as in hir tyme hir knewe, And yet she dyed not so sodeynly; For I have sought hir ever ful besily Sith first I hadde wit or mannes minde; But she was deed, er that I coude hir finde.
Aboute hir herse ther stoden lustily, Withouten any wo, as thoughte me, Bountee parfit, wel armed and richely, And fresshe Beautee, Lust, and Jolitee, Assured Maner, Youthe, and Honestee, Wisdom, Estaat, and Dreed, and Governaunce, Confedred bothe by bonde and alliaunce.
A compleynt hadde I, writen, in myn hond, For to have put to Pite as a bille, But whan I al this companye ther fond, That rather wolden all my cause spille Than do me help, I held my pleynte stille For to that folk, withouten any faile, Withoute Pite may no bille availe.
Then leve I al thise virtues, sauf Pite, Keping the corps, as ye have herd me seyn, Confedred alle by bonde of Crueltee, And been assented that I shal be sleyn. And I have put my compleynt up ageyn; For to my foos my bille I dar not shewe, Theffect of which seith thus, in wordes fewe:—
'Humblest of herte, hyest of reverence, Benigne flour, coroune of vertues alle, Sheweth unto your rial excellence Your servaunt, if I durste me so calle, His mortal harm, in which he is y-falle, And noght al only for his evel fare, But for your renoun, as he shal declare.
'Hit stondeth thus: your contraire, Crueltee, Allyed is ageynst your regalye
Under colour of womanly Beautee,
For men ne shuld not knowe hir tirannye, With Bountee, Gentilesse, and Curtesye, And hath depryved you now of your place That hight "Beautee, apertenant to Grace.”
'For kindly, by your heritage right, Ye been annexed ever unto Bountee ; And verrayly ye oughte do your might To helpe Trouthe in his adversitee. Ye been also the coroune of Beautee; And certes, if ye wanten in thise tweyne, The world is lore; ther nis no more to seyne.
'Eek what availeth Maner and Gentilesse Withoute you, benigne creature? Shal Crueltee be your governeresse? Allas! what herte may hit longe endure? Wherfor, but ye the rather take cure To breke that perilous alliaunce, Ye sleen hem that ben in your obeisaunce.
'And further over, if ye suffre this, Your renoun is fordo than in a throwe; Ther shal no man wite wel what Pite is. Allas! that your renoun shuld be so lowe! Ye be that fro your heritage y-throwe By Crueltee, that occupieth your place; And we despeired, that seken to your grace.
'Have mercy on me, thou Herenus quene, That you have sought so tenderly and yore; Let som streem of your light on me be sene That love and drede you, ay lenger the more. For, sothly for to seyne, I bere the sore, And, though I be not cunning for to pleyne, For goddes love, have mercy on my peyne!
My peyne is this, that what so I desire That have I not, ne no-thing lyk therto; And ever set Desire myn herte on fire; Eek on that other syde, wher-so I go, What maner thing that may encrese wo That have I redy, unsoght, everywhere; Me ne lakketh but my deth, and than my bere.
'What nedeth to shewe parcel of my peyne? Sith every wo that herte may bethinke I suffre, and yet I dar not to you pleyne; For wel I woot, al-though I wake or winke, Ye rekke not whether I flete or sinke. But natheles, my trouthe I shal sustene Unto my deeth, and that shal wel be sene.
"This is to seyne, I wol be youres ever; Though ye me slee by Crueltee, your fo, Algate my spirit shal never dissever Fro your servyse, for any peyne or wo. Sith ye be deed-allas! that hit is so !— Thus for your deth I may wel wepe and pleyne With herte sore and ful of besy peyne.'
Here endeth the exclamacion of the Deth of Pyte.
III. THE BOOK OF THE DUCHESSE
I HAVE gret wonder, by this lighte, How that I live, for day ne nighte I may nat slepe wel nigh noght; I have so many an ydel thoght Purely for defaute of slepe, That, by my trouthe, I take kepe Of no-thing, how hit cometh or goth, Ne me nis no-thing leef nor loth. Al is y-liche good to me— Joye or sorowe, wherso hit be— For I have feling in no-thing, But, as it were, a mased thing, Alway in point to falle a-doun; For sory imaginacioun
Is alway hoolly in my minde.
And wel ye woot, agaynes kinde Hit were to liven in this wyse; For nature wolde nat suffyse To noon erthely creature Not longe tyme to endure
Withoute slepe, and been in sorwe; And I ne may, ne night ne morwe, Slepe; and thus melancolye, And dreed I have for to dye, Defaute of slepe, and hevinesse Hath sleyn my spirit of quiknesse, That I have lost al lustihede.
Suche fantasyes ben in myn hede So I not what is best to do.
But men mighte axe me, why so I may not slepe, and what me is? But natheles, who aske this Leseth his asking trewely. My-selven can not telle why The sooth; but trewely, as I gesse,
I holdë hit be a siknesse
That I have suffred this eight yere, And yet my bote is never the nere ; For ther is phisicien but oon,
That may me hele; but that is doon. Passe we over until eft;
That wil not be, moot nede be left ; Our first matere is good to kepe. So whan I saw I might not slepe, Til now late, this other night, Upon my bedde I sat upright, And bad oon reche me a book, A romaunce, and he hit me took To rede and dryve the night away; For me thoghte it better play Than playen either at chesse or tables. And in this boke were writen fables That clerkes hadde, in olde tyme, And other poets, put in ryme To rede, and for to be in minde Whyl men loved the lawe of kinde. This book ne spak but of such thinges, Of quenes lyves, and of kinges, And many othere thinges smale. Amonge al this I fond a tale
That me thoughte a wonder thing.
This was the tale: Ther was a king That highte Seys, and hadde a wyf, The beste that mighte bere lyf; And this quene highte Alcyone. So hit befel, therafter sone, This king wolde wenden over see.
« PreviousContinue » |