Were all his lieges, bothe lesse and more: Thus in delit he liveth, and hath don yore, Beloved and drad, thurgh favour of fortune, Both of his lordes, and of his commune.
3. Therwith he was, to speken of linage, The gentilest yborne of Lumbardie, A faire person, and strong, and yong And ful of honour and of curtesie: Discret ynough, his contree for to gie, Sauf in som thinges that he was to blame, And Walter was this yonge lordes name.
4. I blame him thus, that he considered nought In time coming what might him betide, But on his lust present was all his thought, And for to hauke and hunt on every side: Wel neigh all other cures let he slide, And eke he n'old (and that was worst of all) Wedden no wif for ought that might befall.
5. Only that point his peple bare so sore, That flockmel on a day to him they went, And on of hem, that wisest was of lore, (Or elles that the lord wold best assent That he shuld tell him what the peple ment, Or elles coud he well shew swiche matere) He to the markis said as ye shull here.
6. O noble markis, your humanitee Assureth us and yeveth us hardinesse, As oft as time is of necessitee,
That we to you mow tell our hevinesse : Accepteth, lord, than of your gentillesse, That we with pitous herte unto you plaine, And let your eres nat my vois disdaine.
7. Al have I not to don in this matere More than another man hath in this place, Yet for as moch as ye, my lord so dere, Han alway shewed me favour and grace,
I dare the better aske of you a space Of audience, to shewen our request, And ye, my lord, to don right as you
8. For certes, lord, so wel us liketh you
And all your werke, and ever have don, that we Ne couden not ourself devisen how We mighten live in more felicitee : Save o thing, lord, if it your wille be, That for to be a wedded man you lest, Than were your peple in soverain hertes rest.
9. Boweth your nekke under the blisful yok Of soveraintee, and not of servise, Which that men clepen spousaile or wedlok: And thinketh, lord, among your thoughtes wise, How that our dayes passe in sondry wise; For though we slepe, or wake, or rome, or ride, Ay fleth the time, it wol no man abide.
10. And though your grene youthe floure as yet, In crepeth age alway as still as ston, And deth manaseth every age, and smit In eche estat, for ther escapeth non: And al so certain, as we knowe eche on That we shul die, as uncertain we all Ben of that day whan deth shal on us fall.
11. Accepteth than of us the trewe entent, That never yet refuseden your hest, And we wol, lord, if that ye wol assent, Chese you a wife in short time at the mest, Borne of the gentillest and of the best Of all this lond, so that it oughte seme Honour to God and you, as we can deme.
12. Deliver us out of all this besy drede, And take a wif, for highe Goddes sake: For if it so befell, as God forbede, That thurgh your deth your linage shulde slake, And that a strange successour shuld take
Your heritage, o! wo were us on live: Wherefore we pray you hastily to wive.
13. Hir meke praiere and hir pitous chere Made the markis for to han pitee.
Ye wol, quod he, min owen peple dere, To that I never er thought constrainen me. I me rejoyced of my libertee,
That selden time is found in mariage; Ther I was free, I moste ben in servage.
14. But natheles I see your trewe entent, And trust upon your wit, and have don ay; Wherfore of my free will I wol assent To wedden me, as sone as ever I may. But ther as ye han profred me to-day To chesen me a wif, I you relese
That chois, and pray you of that profer cese.
15. For God it wot, that children often ben
Unlike hir worthy eldres hem before, Bountee cometh al of God, not of the stren, Of which they ben ygendred and ybore: I trust in Goddes bountee, and therfore My mariage, and min estat, and rest I him betake, he may don as him lest.
16. Let me alone in chesing of my wif,
That charge upon my bak I wol endure: But I you pray, and charge upon your lif, That what wif that I take, ye me assure To worship hire while that hire lif may dure, In word and werk both here and elles where, As she an emperoures doughter were.
17. And forthermore this shuln ye swere, that ye Again my chois shul never grutch ne strive. For sith I shal forgo my libertee
At your request, as ever mote I thrive, Ther as min herte is set, ther wol I wive : And but ye wol assent in swiche manere, I pray you speke no more of this matere.
18. With hertly will they sworen and assenten To all this thing, ther saide not o wight nay: Beseching him of grace, or that they wenten, That he wold granten hem a certain day Of his spousaile, as sone as ever he may, For yet alway the peple somwhat dred, Lest that this markis wolde no wif wed.
19. He granted hem a day, swiche as him lest, On which he wold be wedded sikerly, And said he did all this at hir request; And they with humble herte ful buxumly Kneling upon hir knees ful reverently Him thonken all, and thus they han an end Of hir entente, and home agen they wend.
20. And hereupon he to his officeres
Commandeth for the feste to purvay. And to his privee knightes and squieres Swiche charge he yave, as him list on hem lay: And they to his commandement obey, And eche of hem doth al his diligence To do unto the feste al reverence.
21. Nought fer fro thilke paleis honourable, Wher as this markis shope his mariage, Ther stood a thorpe, of sighte delitable, In which that poure folk of that village Hadden hir bestes and hir herbergage, And of hir labour toke hir sustenance, After that the erthe yave hem habundance.
22. Among this poure folk ther dwelt a man, Which that was holden pourest of hem all: But highe God somtime senden can His grace unto a litel oxes stall : Janicola men of that thorpe him call. A doughter had he, faire ynough to sight, And Grisildis this yonge maiden hight.
23. But for to speke of vertuous beautee, Than was she on the fairest under sonne: Ful pourely yfostred up was she:
No likerous lust was in hire herte yronne; Wel ofter of the well than of the tonne She dranke, and for she wolde vertue plese, She knew wel labour, but non idel ese.
24. But though this mayden tendre were of age, Yet in the brest of hire virginitee Ther was enclosed sad and ripe corage: And in gret reverence and charitee Hire olde poure fader fostred she:
A few sheep spinning on the feld she kept, She wolde not ben idel til she slept.
25. And whan she homward came, she wolde bring Wortes and other herbes times oft,
The which she shred and sethe for hire living, And made hire bed ful hard, and nothing soft: And ay she kept hire fadres lif on loft With every obeisance and diligence, That child may don to fadres reverence.
26. Upon Grisilde, this poure creature,
Ful often sithe this markis sette his eye, As he on hunting rode paraventure : And whan it fell that he might hire espie, He not with wanton loking of folie His eyen cast on hire, but in sad wise Upon hire chere he wold him oft avise,
27. Commending in his herte hire womanhede, And eke hire vertue, passing any wight Of so yong age, as wel in chere as dede. For though the peple have no gret insight In vertue, he considered ful right Hire bountee, and disposed that he wold Wedde hire only, if ever he wedden shold.
28 The day of wedding came, but no wight can Tellen what woman that it shulde be,
« PreviousContinue » |