Was risen, and romed in a chambre on heigh, In which he al the noble cité seigh, And eek the gardeyn, ful of braunches grene, Ther as the fresshe Emelye the scheene Was in hire walk, and romed up and doun. This sorweful prisoner, this Palamon, Gooth in the chambre romyng to and fro, And to himself compleynyng of his woo; That he was born, ful ofte he seyd, alas! And so byfel, by aventure or cas,
That thurgh a wyndow thikke and many a barre Of iren greet and squar as eny sparre, He cast his eyen upon Emelya,
And therwithal he bleynte and cryed, a! As that he stongen were unto the herte. And with that crye Arcite anon up sterte, And seyde, "Cosyn myn, what eyleth the, That art so pale and deedly for to see? Why crydestow? who hath the doon offence? For Goddes love, tak al in pacience
Oure prisoun, for it may non othir be; Fortune hath yeven us this adversité. Som wikke aspect or disposicioun
Of Saturne, by sum constellacioun,
Hath yeven us this, although we hadde it sworn ; So stood the heven whan that we were born;
We moste endure it: this is the schort and pleyn." This Palamon answered, and seyde ageyn, "Cosyn, for-sothe of this opynyoun
Thou hast a veyn ymaginacioun.
This prisoun causede me not for to crye. But I was hurt right now thurgh myn yhe Into myn herte, that wol my bane be. The fairnesse of the lady that I see Yonde in the gardyn romynge to and fro, Is cause of al my cryying and my wo.
I not whethur sche be womman or goddesse ; But Venus is it, sothly as I gesse.'
And therwithal on knees adoun he fil, And seyde: "Venus, if it be youre wil Yow in this gardyn thus to transfigure, Biforn me sorwful wrecched creature,
Out of this prisoun help that we may scape. And if so be oure destyné be schape, By eterne word to deyen in prisoun,
Of oure lynage haveth sum compassioun,
That is so lowe y-brought by tyrannye." And with that word Arcite gan espye Wher as this lady romed to and fro.
And with that sight hire beauté hurt him so, That if that Palamon was wounded sore, Arcite is hurt as moche as he, or more. And with a sigh he seyde pitously: "The freissche beauté sleeth me sodeynly Of hir that rometh yonder in the place; And but I have hir mercy and hir grace That I may see hir atte leste weye,
I nam but deed; ther nys no more to seye." This Palamon, whan he tho wordes herde, Dispitously he loked, and answerde : "Whether seistow in ernest or in pley?" "Nay," quoth Arcite, "in ernest in good fey. God helpe me so, me luste ful evele pleye." This Palamon gan knytte his browes tweye: "Hit nere," quod he, "to the no gret honour, For to be fals, ne for to be traytour
To me, that am thy cosyn and thy brother. I-swore ful deepe, and ech of us to other, That never for to deyen in the payne, Til that deeth departe schal us twayne, Neyther of us in love to hynder other, Ne in non other cas, my leeve brother; But that thou schuldest trewly forther me In every caas, and I schal forther the. This was thyn othe, and myn eek certayn; I wot right wel, thou darst it nat withsayn. Thus art thou of my counseil out of doute. And now thou woldest falsly ben aboute To love my lady, whom I love and serve, And evere schal, unto myn herte sterve. Now certes, fals Arcite, thou schal not so. I loved hir first, and tolde the my woo As to my counseil, and to brother sworn To forther me, as I have told biforn. For which thou art i-bounden as a knight To helpe me, if it lay in thi might, Or elles art thou fals, I dar wel sayn." This Arcite ful proudly spak agayn.
"Thou schalt," quoth he, "be rather fals than I. But thou art fals, I telle the uttirly.
For par amour I loved hir first then thow.
What wolt thou sayn? thou wost not yit now
Whether sche be a womman or goddesse. Thyn is affeccioun of holynesse, And myn is love, as of a creature ; For which I tolde the myn adventure As to my cosyn, and my brother sworn. I pose, that thou lovedest hire biforn; Wost thou nat wel the olde clerkes sawe, That who schal yeve a lover eny lawe, Love is a grettere lawe, by my pan, Then may be yeve to eny erthly man? Therfore posityf lawe, and such decré, Is broke alway for love in ech degree.
He may nought fle it, though he schulde be deed,
A man moot needes love maugre his heed.
Al be sche mayde, or be sche widewe or wyf. And eke it is nat likly al thy lyf
To stonden in hire grace, no more schal I; For wel thou wost thyselven verrily,
That thou and I been dampned to prisoun Perpetuelly, us gayneth no raunsoun.
We stryve, as doth the houndes for the boon,
They foughte al day, and yit here part was noon; 320 Ther com a kyte, whil that they were wrothe, And bar awey the boon bitwixe hem bothe. And therfore at the kynges court, my brother, Eche man for himself, ther is non other. Love if the liste; for I love and ay schal;
And sothly, leeve brother, this is al.
Here in this prisoun moote we endure,
And every of us take his aventure."
If that I hadde leysir for to seye;
Gret was the stryf and long bytwixe hem tweye,
But to the effect. It happed on a day, (To telle it yow as schortly as I may) A worthy duk that highte Perotheus,
That felaw was to the duk Theseus
Syn thilke day that they were children lyte, Was come to Athenes, his felawe to visite, And for to pley, as he was wont to do, For in this world he lovede noman so:
And he loved him as tendurly agayn.
So wel they loved, as olde bookes sayn,
That whan that oon was deed, sothly to telle,
His felawe wente and sought him doun in helle ; But of that story lyste me nought to write. Duk Perotheus lovede wel Arcite,
And hadde him knowe at Thebes yeer by yeer ; And fynally at requeste and prayer
Of Perotheus, withoute any raunsoun Duk Theseus him leet out of prisoun, Frely to go, wher him lust overal, In such a gyse, as I you telle schal. This was the forward, playnly to endite, Betwixe Theseus and him Arcite :
That if so were, that Arcite were founde Evere in his lyf, by daye or night, or stound In eny contré of this Theseus,
And he were caught, it was acorded thus,
That with a swerd he scholde lese his heed;
Ther nas noon other remedy ne reed,
But took his leeve, and homward he him spedde; Let him be war, his nekke lith to wedde.
How gret a sorwe suffreth now Arcite !
The deth he feleth thorugh his herte smyte; He weepeth, weyleth, cryeth pitously; To slen himself he wayteth pryvyly. He seyde, "Allas the day that I was born! Now is my prisoun werse than was biforn; Now is me schape eternally to dwelle Nought in purgatorie, but in helle. Allas! that ever knewe I Perotheus! For elles had I dweld with Theseus I-fetered in his prisoun for evere moo. Than had I ben in blis, and nat in woo. Oonly the sight of hir, whom that I serve, Though that I hir grace may nat deserve, Wold han sufficed right ynough for me. O dere cosyn Palamon," quod he, "Thyn is the victoire of this aventure, Ful blisfully in prisoun to endure;
In prisoun? nay, certes but in paradys! Wel hath fortune y-torned the the dys,
That hath the sight of hir, and I the absence. For possible is, syn thou hast hir presence, And art a knight, a worthi and an able, That by som cas, syn fortune is chaungable, Thou maist to thy desir somtyme atteyne. But I that am exiled, and bareyne Of alle grace, and in so gret despeir, That ther nys water, erthe, fyr, ne eyr, Ne creature, that of hem maked is, That may me helpe ne comfort in this.
Wel ought I sterve in wanhope and distresse ; Farwel my lyf and al my jolynesse. Allas! why playnen folk so in comune Of purveance of God, or of fortune, That yeveth him ful ofte in many a gyse Wel better than thei can hemself devyse? Som man desireth for to have richesse, That cause is of his morthre or gret seeknesse. And som man wolde out of his prisoun fayn, That in his hous is of his mayné slayn. Infinite harmes ben in this mateere;
We wote nevere what thing we prayen heere. We faren as he that dronke is as a mows. A dronke man wot wel he hath an hous, But he not nat which the righte wey is thider, And to a dronke man the wey is slider, And certes in this world so faren we. We seeken faste after felicite, But we gon wrong ful ofte trewely. Thus may we seyen alle, and namely I, That wende have had a gret opinioun, That yif I mighte skape fro prisoun, Than had I be in joye and perfyt hele, Ther now I am exiled fro my wele. Syn that I may not se yow, Emelye, I nam but deed; ther nys no remedye." Uppon that other syde Palomon, Whan he wiste that Arcite was agoon, Such sorwe maketh, that the grete tour Resowneth of his yollyng and clamour. The pure feteres of his schynes grete Weren of his bitter salte teres wete. "Allas!" quod he, " Arcita, cosyn myn, Of al oure strif, God woot, the fruyt is thin. Thow walkest now in Thebes at thi large, And of my woo thou yevest litel charge.
Thou maiste, syn thou hast wysdom and manhede, Assemble al the folk of oure kynrede, And make a werre so scharpe in this cité, That by som aventure, or by som treté, Thou mayst hire wynne to lady and to wyf, For whom that I moste needes leese my lyf. For as by wey of possibilité,
Syn thou art at thi large of prisoun free, And art a lord, gret is thin avantage,
More than is myn, that sterve here in a kage.
« PreviousContinue » |